Iedere daarde donderdag van de maond
Koomt wij veur gezellig saomen eten bij elkaor
En dan stiet er altied een heerlijke maoltied veur oons klaor
Ik loop om vief uur naor de Spil op mien gemakkie
Woon op stienworpafstaand, dus kat in bakkie
In oons prachtig mooie MFC
Hebt een stel vrijwilligers de boel al weer aordig op glee
Ze hebt dan al flink wat veurwaark verricht
En dat doet ze mit plezier, ze vuult ’t niet as een plicht
Wij zit vol verwachting klaor mit zo’n kleine dartig man
Wat zet ze oons vandaog weer veur, wat komt er oet de de pan?
En wij wordt eigenlieks nooit teleursteld
’t Is altied lekker, dat mag vermeldt
Eerpels mit lekkere gruunte, pasta mit lekkere saus
Kapucieners, broene bonen, of ok wel stamppot mous
Snert mit katenspek op roggebrood
Meinsen, de ogen wordt je bijkaans groot
Spekkies, rookworst, een lekker stukkie fleis
Variatie genog, altied weer wat neis
En dan de toetjes, daor kiekt wij steeds naor oet
Omdat ze daor meestal wel wat bijzunders mit doet
Griekse yoghurt mit hunnig en walneuten d’r in
Een waofel mit warme kaarsen en slagroom is oons ok wel naor ’t zin
Ijs mit siroop, vla of een heerlijke moes
Lekker, lekker, niet veur de poes
We laot ‘t oons heerlijk smaoken, wat ze oons zo veurzet
Saom’n gezellig wat babbeln, wat bint we hier toch wies mit
Nao zo’n anderhalf uur gaot we dan weer op hoes an
Beheurlijk voldaon én volgedaon bint wij dan
Vrijwilligers, harstikke bedankt veur wat je veur oons doet
Die daarde donderdag van de maond
Ik kiek er steeds naor oet!!
(D)Riekie van Wissen
