As corona niet weer roet in het eten gooit, kan in het neie jaor 2022 weer streden worden um de
Streektaolstried in ‘De Spil’ in Gasselternijveen.
Op vrijdag 21 jannewaori hoop we met veul inwoners van oonze gemeente der een gezellige bijeenkomst van te maoken. Der kunt zuch 30 teams opgeven um dizze Drèentse pubquiz in Nieveen te speulen. Dat bint veer groepen meer as in 2019 in Raol, waor de eerste stried holden is.

De wedstried wordt opnei organiseerd deur de Streektaolvrijwilligers van het Huus van de Taol in Aa en Hunze. De ‘spreekstalmeester’ is, net as de eerste maol, de old-Huusdirecteur Jan Germs oet Gasselt.

Alle groepen die twee jaor leden metdaon hebt, kregen onlangs een mail van de Streektaolambassadeur Jan Hartlief. Hierin weurden ze waarm maokt um volgend jaor weer deel te nimmen an de streektaolstried. Dit betekent niet dat aandere (vrienden)groepen, clubs of verenigings heur niet kunt anmelden. Iedereen kan metdoon!

De eerste 30 opgaoves die binnenkomt vanaof dunderdag 25 november 2021 noteer we as deelnimmer.
‘Wie het eerst komp, het eerst maolt’. Een team telt minimaol vier en maximaol vief personen.

Wi’j metdoon? Meld je dan an bij: jghartlief@ziggo.nl (06-46325905) of roelie@pattyjoris.nl (0592-264001)  

De Streektaolstried begunt 21 jannewaori um 20.00 uur, inloop vanof 19.30 uur. We rekent der netuurlijk op dat de winnaors van 2019 ‘De Broekstreek’ van de partij bint. Zij wordt nog een maol oetdaogd de stried an te binden met de aandere teams.

De vrijwilligers van het Huus van de Taol in Aa en Hunze rekent derop daw met mekaor weer een mooie stried gaot strieden!