Zesentwintig groepen bestaonde oet veer of vief personen, allemaol aofkomstig oet de gemeente Aa en Hunze, bonden 24 jannewaori in Grand Café Hofsteenge in Raol met mekaor de stried an om de fel begeerde trofee die te winnen was tiedens de eerste ‘Streektaolstried’ .
De ‘Streektaolstried’ is een quiz die geheuil in de Drèentse taol holden wordt. De organisatie lig in handen van de vertegenwoordigers oet de gemeente Aa en Hunze van het ‘Huus van de Taol’: de Taolschulte en zien Keurnoten.
In aacht rondes met aal aacht opdrachten muzzen de groepen zich bugen over de vraogen die onder meer betrekking hadden op de Drèentse taol, cultuur, geschiedenis en muziek.
De prissentatie van dizze aovond was in goeie handen van Jan Germs, old-directeur van het ‘Huus van de Taol’ in Beilen, die naost de vraogstelling een schat an mooie infermaotie deurgaf an de deelnemers over de provincie Drenthe in al zien facetten.
An het èeinde van de aovond gungen, nao een spannende stried, vief inwoners oet Aomen en Eikhaor, onder de noemer ‘de Broekstreek’ der met de pries vandeur.
Behalve de wisseltrofee wörden ze alle vief eigenaor van een staopel mooie Drèentse boouken.
Gezien het succes en de reacties oet de zaol beloofde de Taolschulte, Jan Hartlief, tot slot dat het niet bij dizze ene keer blieven zal. Aander jaor stèeit de ‘Streektaolstried’ wederom op het programma.
Op de foto (Gea Aling): v.l.n.r.
Bert Jagt, Jan Vrijs, Geke Wolf, Henk Wolf, Janny Jagt
